Ateangaireacht ó agus go teangacha comharthaíochta ag comhdhálacha
An chaoi a n-oibríonn an ateangaireacht chomharthaíochta
Tá cumarsáid éifeachtach riachtanach ag comhdhálacha, agus tá ról ríthábhachtach ag an ateangaireacht chomharthaíochta chun a chinntiú gur féidir le rannpháirtithe bodhra páirt iomlán a ghlacadh san imeacht.
Oibríonn ateangairí comharthaíochta idir teanga labhartha agus teanga chomharthaíochta, mar shampla, ón bhFraincis go dtí Teanga Chomharthaíochta na Fraince, agus a mhalairt. Is féidir ateangaireacht a chur ar fáil idir dhá theanga chomharthaíochta éagsúla freisin.
De ghnáth, oibríonn ateangairí comharthaíochta comhdhála i mbuíonta teanga ina bhfuil beirt nó níos mó ná sin, ag brath ar chlár agus ar dhéine na comhdhála. Bíonn tuilleadh ateangairí comharthaíochta ag teastáil nuair a bhíonn ateangaireacht de dhíth le linn sosanna nó le linn chuid shóisialta an chláir.
Le linn na comhdhála, is iondúil go mbíonn an t-ateangaire comharthaíochta ina sheasamh in aice leis an gcainteoir, os comhair an lucht féachana, chun radharc gan bhac a thabhairt do rannpháirtithe bodhra ar an gcainteoir, ar an gcur i láthair agus ar an ateangaire.
Nuair a bhíonn siad ag obair i bhfoireann, glacann ateangairí comharthaíochta a seal thart ar gach 15 nóiméad. Tacaíonn an dara hateangaire leis an ateangaire atá ag comharthaíocht, a dhearbhaíonn, mar shampla, cruinneas na hateangaireachta nó a dhéanann seiceáil maidir le haon mhíthuiscint nó easnamh.
Féadfaidh ateangairí comharthaíochta comhdhála a bheith ag obair le níos mó ná teanga chomharthaíochta amháin freisin.
Ateangaireacht chomharthaíochta Idirnáisiúnta
De réir mar a éiríonn imeachtaí idirnáisiúnta agus imeachtaí de chuid an Aontais níos inrochtana d’úsáideoirí teangacha comharthaíochta éagsúla, tá éileamh níos mó ar sheirbhísí ateangaireachta comharthaíochta idirnáisiúnta. Tá tacar speisialta scileanna agus saineolais ag ateangairí comharthaíochta idirnáisiúnta.
Faigh tuilleadh eolais faoin Ateangaireacht chomharthaíochta Idirnáisiúnta san fhíseán ‘Ateangaireacht Chomharthaíochta Idirnáisiúnta ag comhdhálacha: cén chaoi a bhfuil sí éagsúil?’. Taifeadadh an físeán ag 100 bliain de Chleachtas Ateangaireachta Comhdhála sa Ghinéiv in 2019.
Dea-chleachtais maidir le hateangaireacht chomharthaíochta
Bíodh tuiscint agat ar do lucht féachana
Sula gcuirfidh tú ateangairí comharthaíochta in áirithe, seiceáil le do lucht féachana cé na teangacha comharthaíochta a thuigeann siad agus is rogha leo. Cuideoidh sé sin leat ateangairí a chomhlíonann na riachtanais sin agus a bhfuil na scileanna cearta acu a chur in áirithe.
Tabhair do d’aire, i ngeall ar shrianta lóistíochta, ní chuireann institiúidí an Aontais ach ateangaireacht chomharthaíochta ar fáil sa Chomharthaíocht Idirnáisiúnta.
Ullmhaigh na hateangairí
Chun a chinntiú gur féidir le gach duine an chomhdháil a leanúint agus páirt iomlán a ghlacadh inti, comhroinn an clár agus na doiciméid leis na hateangairí comharthaíochta roimh ré. Ach an oiread le hateangairí teanga labhartha, bíonn am ag teastáil ó ateangairí comharthaíochta chun ullmhúchán a dhéanamh. Cuir ábhair chlóite nó dhigiteacha ar fáil chomh luath agus is féidir, ó tharla nach féidir leis na hateangairí a bheith ag léamh agus ag comharthaíocht ag an am céanna.
Bíodh na sonraí teicniúla mar is ceart
Maidir le ceanglais theicniúla, cuir i gcás suíomh optamach ateangairí nó ateangaireacht chomharthaíochta a shruthú ar an ngréasán, féach treoirlínte Chumann Idirnáisiúnta na nAteangairí Comhdhála (AIIC):
- Treoirlínte AIIC le haghaidh ateangairí comharthaíochta a shuíomh ag comhdhálacha, sruthú gréasáin san áireamh
- Treoirlínte AIIC le haghaidh ateangairí labhartha a oibríonn i mbuíonta measctha
- Ceisteanna coitianta maidir le hAteangaireacht Chomharthaíochta
Tá roinnt eolais curtha le chéile againn freisin maidir le hAteangaireacht chomharthaíochta sa tseirbhís phoiblí agus i suíomhanna dlí.
Cumainn Ghairmiúla
AIIC - Cumann Idirnáisiúnta na nAteangairí Comhdhála (AIIC)/Association Internationale des Interprètes de Conférence
Is é AIIC an t-aon chumann domhanda d’ateangairí comhdhála.
Fóram Eorpach na nAteangairí Comharthaíochta (EFSLI)
Is eagraíocht ateangairí comharthaíochta faoi stiúir ballraíochta Eorpaí é EFSLI. Cuimsítear ar na comhaltaí cumainn náisiúnta agus réigiúnacha chomh maith le comhaltaí aonair agus comhaltaí comhlacha.
Cumann Domhanda na nAteangairí Comharthaíochta (WASLI)
Tá ateangairí comharthaíochta ó go leor áiteanna ar fud an domhain ina gcomhaltaí de WASLI. Is é an aidhm gairm na hateangaireachta comharthaíochta a chur chun cinn ar fud an domhain. Is féidir le daoine aonair bheith ina gcomhaltaí nó is féidir leo clárú trí chumainn náisiúnta.