Is é misean Ard-Stiúrthóireacht na hAteangaireachta cumarsáid ilteangach a chumasú ag croílár chinnteoireacht an Aontais trí sheirbhísí ateangaireachta ardcháilíochta a sholáthar. Chun deimhin a dhéanamh de go mbeidh go leor ateangairí comhdhála cáilithe ar fáil, cuireann Ard-Stiúrthóireacht na hAteangaireachta tacaíocht oiliúna ar fáil do líon teoranta cúrsaí (sna Ballstáit, i dtíortha is iarrthóirí nó i dtríú tíortha fiú nuair a bhíonn cúis leis sin mar gheall ar riachtanais institiúidí an Aontais) a mbíonn an curaclam agus na cleachtais oideolaíocha lena mbaineann i gcomhréir leis na critéir thíos, nó a bhfuil sé de sprioc acu go mbeidís i gcomhréir leo. Is féidir tús/deireadh a chur leis an gcomhar ag aon am.
Comhar le hOllscoileanna san Aontas agus i dTíortha is Iarrthóirí
Na critéir le haghaidh comhair
Struchtúr agus eagrúchán an chúrsa
Bíonn ateangaireacht chomhdhála in eagraíochtaí idirnáisiúnta thar a bheith sonrach agus éagsúil le cineálacha eile idirghabhála teanga. Is é an chonclúid tar éis go leor blianta de thaithí ar oiliúint in-tí agus ar chéimithe ollscoile a thástáil go mbíonn sé riachtanach go gcloífeadh cúrsa ateangaireachta le hardchaighdeáin má tá sé chun scil ghairmiúil inúsáidte a chothú.
Is próiseas ardroghnaíoch í dea-oiliúint ateangaireachta comhdhála a thosaíonn le scagadh ar acmhainneacht na n-iarrthóirí (líofacht sa teanga dhúchais agus i dteangacha iasachta, scileanna cumarsáide, láithreoireachta agus anailísithe, eolas ginearálta, srl) agus níl an oiliúint sin acadúil ná ceaptha le haghaidh teangacha a fhoghlaim.
Dá réir sin, moltar d’Ollscoileanna agus d’Institiúidí Ardoideachais (dá dtagraítear ina dhiaidh seo mar ‘ollscoileanna’) na treoirlínte seo a leanúint, bunaithe ar churaclam na Máistreachta Eorpaí san Ateangaireacht Chomhdhála (EMCI), arna bhforbairt i gcomhpháirt ag príomhollscoileanna agus ag institiúidí an Aontais:
- Ba cheart cúrsaí a eagrú ar leibhéal máistreachta nó iarchéime (agus iad neamhspleách ó thaobh an struchtúir de ar ranna teanga nó aistriúcháin, más féidir)
- Ní mór an curaclam agus faisnéis ábhartha eile faoin gcúrsa a chur ar fáil go poiblí agus a phostáil ar líne
- Ba cheart cead isteach sa chúrsa a bheith oscailte do chéimithe oiriúnacha a bhfuil eolas cuí acu ar theangacha ó gach réimse staidéir ar an gcoinníoll go bhfaigheann siad pas i dtástáil inniúlachta shonrach. Rialófar na critéir maidir le ligean isteach agus an cúrsa a chríochnú go rathúil go heisiach de réir phrionsabail na cáilíochta seachas na cainníochta
- Ba cheart gníomhaíocht chleachtaidh maidir le hateangaireacht chomhuaineach agus le hateangaireacht iaruaineach a bheith i gceist leis na cúrsaí den chuid is mó
- Ba cheart go ndéanfadh gairmithe gníomhacha, atá creidiúnaithe, de rogha, mar ateangairí comhdhála le hinstitiúidí an Aontais nó le heagraíochtaí idirnáisiúnta eile, an oiliúint a chur ar fáil
- Ba cheart go mbeadh an comhordaitheoir cúrsa ina ghairmí gníomhach ag a bhfuil an neamhspleáchas oideolaíoch na dálaí sin a chinntiú agus tionchar díreach ag an té sin ar dhearadh churaclam an chúrsa agus ar mhonatóireacht ina leith
- Ní foláir nó go mbeidh giúiréithe na scrúduithe deiridh comhdhéanta d'oiliúnaithe ón gclár agus de mheasúnóirí seachtracha atá ina n-ateangairí comhdhála gníomhacha
- Ní mór do chéimithe pas a fháil i scrúduithe sa dá mhodh ateangaireachta ag an am céanna chun dioplóma a fháil
- Ba cheart cáilíocht na gcéimithe a bheith iomchuí chun ceanglais tástála creidiúnúcháin sna hInstitiúidí Eorpacha a chomhlíonadh
Riachtanas na seirbhíse
I gcás go gcomhlíonann cúrsa na caighdeáin is gá, féadfaidh Ard-Stiúrthóireacht na hAteangaireachta tacú le hiarrachtaí oiliúna na hollscoile sin trí chúnamh oideolaíoch agus/nó airgeadais a chur ar fáil, faoi réir ag infhaighteacht acmhainní agus i gcomhréir lena plean comharbais agus lena riachtanais earcaíochta. Faoi láthair clúdaítear riachtanais Ard-Stiúrthóireacht na hAteangaireachta a dhóthain trí chomhar leis na hollscoileanna atá liostaithe thíos. Déanfar athbhreithniú ar an liosta sin go rialta.
I gcás nach gcomhlíonann an cúrsa na caighdeáin is gá (go fóill), féadfaidh Ard-Stiúrthóireacht na hAteangaireachta comhoibriú leis an ollscoil, más gá i gcomhar leis na húdaráis áitiúla, agus é sin ríthábhachtach le haghaidh fheidhmiú réidh Sheirbhísí Ateangaireachta an Aontais.
Comhar le comhpháirtithe i dtíortha nach Ballstáit den AE iad
Féadfaidh cúrsaí oiliúna ateangaireachta comhdhála arna n-eagrú ag ollscoileanna i dtíortha lasmuigh den Aontas a bheith ar an liosta sin freisin, maidir le cláir um chomhar idirnáisiúnta agus/nó de bharr riachtanais institiúidí an Aontais agus a Seirbhísí Ateangaireachta.
Séanadh: ní hionann a bheith san áireamh ar an liosta seo agus teidlíocht uathoibríoch ag an ollscoil a eagraíonn an cúrsa sin ar aon tacaíocht. Ní bheidh an Coimisiún Eorpach freagrach as cáilíocht na hoiliúna a chuirtear ar fáil ar na cúrsaí atá liostaithe anseo.
Agus cúrsa á roghnú, tabhair aird freisin ar an moltaí arna bhfoilsiú ag AIIC.
Comhdháil Ollscoileanna-AS na hAteangaireachta
Ó bhí 1996 ann, tá Ard-Stiúrthóireacht na hAteangaireachta ag eagrú Chomhdháil na nOllscoileanna-SCIC gach Earrach, príomhócáid bhliantúil ár nArd-Stiúrthóireachta ina dtugtar na páirtithe leasmhara ábhartha i saol na hAteangaireachta le chéile: ionadaithe ollscoileanna comhpháirtíochta i mBallstáit an Aontais agus i dtíortha is iarrthóirí, sa tSín, sa Rúis, san Afraic, i gCeanada agus sna Stáit Aontaithe, mar aon le hionadaithe eagraíochtaí idirnáisiúnta agus institiúidí Eorpacha eile.
Is iad príomhchuspóirí na comhdhála feasacht a mhúscailt maidir le ceanglais an Aontais i dtaobh ateangaireachta agus nuashonrú a thabhairt do rannpháirtithe maidir leis na forbairtí is déanaí, ach freisin ardán líonraithe a chruthú agus díospóireachtaí agus malartuithe beo fuinniúla a chothú faoi ábhair a bhaineann le hateangaireacht.
Bhí eagrán 2019 den Chomdháil ar siúl an 4-5 Aibreán sa Bhruiséil.
