Skopri x’tagħmel l-industrija tal-lingwi u kif il-Grupp ta’ Esperti tal-Industrija tal-Lingwi jgħin lill-Kummissjoni Ewropea fir-rigward tax-xejriet fil-qasam tat-traduzzjoni, tat-teknoloġiji tal-lingwa, u tal-iżviluppi tal-industrija.
L-industrija tal-lingwi
L-industrija tal-lingwi għandha rwol vitali biex toħloq rabta fost in-nies, in-negozji, u l-komunitajiet billi tipprovdi servizzi lingwistiċi għal soluzzjonijiet multilingwi. Dawn is-servizzi jinkludu:
- it-traduzzjoni
- l-interpretazzjoni
- it-teknoloġiji tal-lingwa
- it-traduzzjoni awdjoviżiva
- posteditjar.
Wara dawn is-servizzi hemm professjonisti li jiżguraw li l-messaġġi u l-ideat jaslu għand l-udjenzi fil-format it-tajjeb u li jkun fihom il-kontenut it-tajjeb. Bis-saħħa ta’ dawn il-professjonisti u tat-teknoloġiji avvanzati tal-lingwa — inklużi dawk ibbażati fuq l-IA — in-negozji u l-pubbliku jistgħu jaċċessaw l-informazzjoni bil-lingwi li l-aktar li jafu.
Id-Direttorat Ġenerali għat-Traduzzjoni (DĠT) tal-Kummissjoni Ewropea jifforma parti mill-industrija tal-lingwi permezz tat-traduzzjonijiet, l-editjar, u s-servizzi bbażati fuq l-IA. Id-DĠ jikkonsulta regolarment mal-Grupp ta’ Esperti tal-Industrija tal-Lingwi (LIND) għal għarfien addizzjonali dwar l-iżviluppi ta’ dan is-settur dinamiku u li qed jiżviluppa malajr.
Suġġetti ta’ interess komuni jinkludu:
- kif għandhom jiġu indirizzati d-distakki perċepiti fil-ħiliet
- kif l-IA taffettwa lill-professjonijiet lingwistiċi
- it-taħriġ tal-professjonisti tal-futur.
Dawn ta’ spiss jiġu diskussi f’kooperazzjoni man-netwerk tal-EMT.
Dokumenti rilevanti tal-grupp LIND
Il-grupp LIND jipprovdi għarfien espert tal-industrija mhux biss lid-DGT iżda lill-pubbliku ġenerali f’oqsma differenti, kif muri hawn taħt.
Rapporti tal-ELIS dwar is-suq
Fl-2013, l-Unjoni Ewropea tal-Assoċjazzjonijiet tal-Kumpaniji tat-Traduzzjoni (EUATC) nediet l-Istħarriġ dwar l-Industrija Lingwistika Ewropea (ELIS, European Language Industry Survey). Illum il-ġurnata, l-ELIS jiġi organizzat flimkienmal-ELIA, il-FIT Europe, il-GALA, in-network universitarju tal-EMT, il-grupp LIND tal-Kummissjoni Ewropea, u l-Women in Localization. L-istħarriġ ikopri x-xejriet, l-aspettattivi, u t-tħassib tas-suq, l-isfidi u l-ostakli, u l-bidliet fil-prattiki kummerċjali. Isir kull sena u jiġi ppreżentat f’webinar miftuħ għall-pubbliku.
Rapporti tal-ELIS
Kampanja dwar il-viżibbiltà tal-industrija
Il-professjonijiet lingwistiċi għaddejjin minn żmien ta’ bidla u qed jaġġustaw ruħhom għall-era l-ġdida tal-IA. Biex iħejju lill-professjonisti futuri, l-esperti tal-industrija tal-lingwi żviluppaw, bl-appoġġ tad-DGT, sensiela ta’ gwidi stimulanti maħsubin għall-istudenti, għall-għalliema, u għall-ġenituri. Dawn juru l-versatilità u l-opportunitajiet globali li għandha x’toffri karriera fil-qasam tal-lingwi.
- Gwida għall-istudenti, bl-Ingliż
- Gwida għall-istudenti, bil-Franċiż
- Gwida għall-istudenti, bil-Ġermaniż
Promozzjoni tat-traineeships
It-traineeships għandhom sehem vitali fil-ħolqien ta’ karrieri sodi għall-ġodda u jgħinu lill-organizzazzjonijiet biex jikbru. It-traineeships inaqqsu d-distakk bejn it-taħriġ u l-prattika professjonali, filwaqt li jgawdu minnhom it-trainees u l-organizzazzjonijiet ospitanti.
L-għoti ta’ esperjenza fid-dinja reali lit-trainees jinvolvi li jingħataw opportunità li japplikaw il-ħiliet li jkunu kisbu tul l-istudji tagħhom u jitgħallmu oħrajn ġodda filwaqt li jibnu networks professjonali li jiftħulhom il-bibien fil-futur.
Biex jiġu ffaċilitati r-riċerka għat-traineeships u l-organizzazzjoni tagħhom, l-esperti tal-grupp LIND ingħaqdu man-network tal-EMT u ħejjew għodod u gwidi għall-istudenti u għall-kumpaniji li qed jaħsbu biex jimpjegaw trainees.
Iċ-Ċentru tal-Għarfien dwar it-Traduzzjoni u l-Interpretazzjon (KCTI) jippromwovi t-traineeships fl-Ewropa u lil hinn minnha fit-taqsima tal-karrieri tagħha.